上次見阿傑已經係三年前嘅事，當年因為佢係我哋公司大客所以受我哋邀請上嚟商談業務發展，佢嗰陣主力做礦機買賣生意 (即高運算桌面電腦) 但有別於一般比特幣礦場，佢嗰四個礦場主力唔係做掘礦生意而係向雲端公司提供儲存空間，礦機銷售對象為普羅大眾，除咗佢自己嗰五十部礦機之外其餘都係客戶名下持有，運作有啲似傳銷業嘅層壓式推銷，佢以一個價錢賣一部礦機俾A並收取月費幫A管理礦機保養同運作，A嗰部礦機除咗有機會掘到比特幣之外 (其實只係宣傳策略) 仲會因為提供儲存空間而定期收到若干回贈，只要A轉介到B同C投資礦機，A就會得到若干佣金如此類推。聽講一部礦機售價為港幣十六萬而佢已經有接近二百位客戶。因為佢嘅礦場係以儲存空間作主力業務同我哋Protocal Labs嘅服務不謀而合 (又或佢其實專登迎合我哋嘅業務需要) 所以成為我哋合作對象之一。